يـــــــــــــــــــــــآه وأخيرا خلص العرض 
يعني لما جيت من الجامعه اليوم نمت وحسيت نفسي كنت شايله جبل وحطيته 
, إنهااااااك من قلب 
كنت اقول للبنات تكفون خلونا نحط خلف الكواليس والله تعطينا الدرجه الكامله . 
شقول بس عن التجهيزات وش اخلي .! من بدت الدراسه حنا كنا اول مجموعه لهالماده وعليه نص درجه الشهري تقريبا 
وتبي ابداع عسى ماكو ابداع يارب 
. . ومن فكره لفكره وهواش واراء وحااااااااله . .
يعني كنا نبي نبدا العرض بأسلوب غير تقليدي بحيث نشد الانتباه ففكرنا بمشهد غريب نوعا ما
وياليت ماحطينا مشهد لان لونا حاطين فلم او مسلسل رمضاني كان ماتعبنا هالتعب عليه . .
والله صرت مااشوف البنات الا ويحكون عن المشهد وهالعرض الين خلاص جد جتني حومة كبد مو طبيعيه . .
صرت اقول بليز اذا شفتوني لاتتكلمون في العرض لاني جد احسني بكب اللي بكبدي . .
وصارت مواقف مضحكه واكيد لاتخلوا من الفصلات شوي . .
واحيانا تتش وتعصيب في مواقف مال امها داعي ومن بكره ترجع المياه لمجاريها . .
معنا قطبين دايم مولعين ولو انقال لهم السلام عصبوا , أنا واريج 
لما نجي نتناقش توقف بينا هدى لانها عارفه يمكن اكفخها , هالانسانه مادري شقول بجد بجد اذا انتي راعيه اعصاب لاتناقشينها 
تنرررفز بسرعه وماتتحمل .. ياحبي لها 
, اذا عصبت تجيها هدى تقول وه خديداتك صارت حمرا . .
وتخيلوا بس احد معصب واحد جالس يقبص خدوده بكل برود 
. .
القروب كله يضحك على ردة الفعل اللي من اريج ونظره الاستحقار اللي تطلقها لهدى اللي تحاول تهديها بأسلوب ينرفز
وعندنا هدى ( الام ) كله تحرص 
, كل ماشافت وحده منا تجلس تحرصها لاتنسين ولاتنسين وسوي وسوي . .
وهديل حاطينها للازمات اذا نشبت الحرب الكلاميه تتدخل تسكتهم <<~ ياكثر الحروب 
ومزنه الشخص اللي لاهي بعمره 
لدرجة انها اليوم جايه ناسيه ورقتها وبغت تجلد طبعا . .
وخلود بين وبين حسب المزاج احيانا تدخل في النقاشات الحاده واحيانا وضيفتها تعلق ع الوضع . .
ولا يهونون البقيه . .
الصراحه بالرغم من الايام اللي تعبنا فيها الايام اللي فاتت الا انها كان لذيذه لصفاء قلوب البنات . .
كلنا كنا قلب وروح وحده ( الله لايغير علينا ) ,
نزعل ونتناقش بحده بس نرجع وكأن شي ماصار لان القصد ماكان نقاش لمجرد النقاش بقد ماكان للوصول للافضل
نجي ليوم العرض المنشوووود 
:
الثلاثاء : 26-10-2010 م
توتر مو طبيعي , خلاص يااما نجاح يتوج تعب الايام اللي فاتت والا فشل 
. .
من الصباح تصبحت بوجه الامن اللي خذوا مني ( البروجكت )
حسيت اني موب رايقه اتناقش معها والا بروجكت لاهو لاب توب ولا جوال , أجل لو شافت اللاب اللي بشنطتي وش بتسوي .! 
قلت بكل قل حيله انتبهي له بروح اجيب ورقه من الوكيله وارجع لك . .
رحت للبنات قلت لهم السالفه وراحوا جابوه . .
وطول اليوم تعليق ع اشكالنا المسكينه والتوتر واصل اقصاه 
. .
وخلود مسكينه اصلا تعبانه وكانت غايبه لها ثلاث ايام بس جت عشان العرض وقبله معها علاجات جالسه تاكل كنها عجيز
ياحبي لها تقول والله المغص ماعاد هو في بطني صار برجلي 
.. يالبا قلبها
وبدا العرض كان بجد بجد مو لانه حقنا يعني بس لاني كنت من الحضور << ههههههه فيس يطالع ميزو
لما خلص العرض جتني ميته ضحك تقول لالالا انتي مو معنا اصلا من الحضور حضرتك ..! 
جالسه وتلعب بشعرها وتتابع بكل انصات 
<< اللي هي انا
انا والله توني الاحظ اني فعلا كنت من الحضور 
,, لالا القيت الجزء حقي وجلست على اللاب عشان امشي الشرايح . .
بس مالاحظت اني جالسه بكل اريحيه ههههههههههههههه
المهم خلص والكل يمدح وهذا 
ولله الحمد
كل قروبي احبكم حتى شريكتي مزنه بعد ترا احبك 
